متطلبات دخول الجامعة العبرية بقلم اماني سلهب

#هام لطلاب التوجيهي ...
- السنة التحضيرية في الجامعة العبرية
كثير عم توصلني رسائل عن السنة التحضيرية، كيف؟ ليش؟ وين؟ ضايعين؟ نسجل؟ ما نسجل؟ .....
بهذا البوست رح أكتب عن تجربتي الشخصية كطالبة مش كمُروجة للجامعة ولا حدا بوخذ نسبة ع كل طالب بسجل بالسنة التحضيرية، ورح أكتب بكل شفافية ووضوح وبدون تلميع وتسويق، وبهذا البوست رح أحكي عن:
- منحة صدارة.
- التسجيل للسنة التحضيرية، شو هي السنة التحضيرية.
- البسيخومتري "الوزن الأثقل".
- شو بعد السنة السنة التحضيرية.
- نصائح.
أولاً: منحة صدارة هي عبارة عن منحة مقدمة من البلدية هدفها زيادة عدد الطلاب العرب في الجامعة العبرية خاصة
والمؤسسات التعليمية و الأكاديمية "الاسرائيلية"، وهي تقريباً منحة بتغطي جميع القسط التعليمي للسنة التحضيرية يلي ممكن يوصل ل 20 ألف شيكل بالسنة، مُقدمة للطلاب يلي معدلهم بالتوجيهي 90 وفوق "وزاري".
ثانياً:التسجيل للتحضيرية اون لاين - المفروض تتوجهوا لمكتب المركزة بالجامعة العبرية- كامبوس "هار هتسوفيم- العيسوية-" - مبنى روثبرغ\ بوبرالطابق الرابع، بتوخد الايميل تاعكم وبتبعتلكم الطلب ع الايميل، "اعتقد" التسجيل لحد تاريخ 30\6 - **يلي بعرف التاريخ بالضبط يا ريت يعدلني.
القبول للسنة التحضيرية لا يعني أبداً القبول للجامعة العبرية، لا يعني ابداً انك ضامن مكانك في مقاعد الجامعة "أبداً"، هاي السنة من اسمها بتحضرك للحياة الجامعة، بتعلمك اللغة وبعض الكورسات الأساسية، من المهم انه نعرف انه هاي مش فترة نقاهة و العلامة بالسنة التحضيرية عشان تفيدك لازم تكون علامة عالية.
شو يعني علامة عالية؟ يعني 90 فما فوق.
بشو بتفيد العلامة؟ العلامة ممكن تساعدنا في القبول للجامعة العبرية وكل ما كانت أعلى كل ما كان وزنها أثقل، بالعادة بعملوا معدل (علامة السنة التحضيرية+ علامة البسيخومتري) وكل ما جينا علامة أعلى بالسنة التحضيرية كل ما كان مطلوب منا نجيب أقل في البسيخومتري.
ثالثاً: البسيخومتري: هو عبارة عن امتحان قطري وتقريبا علامته هي الحاسمة وخصوصاً في طلاب التوجيهي، أغلب الجامعات "الاسرائيلية" بتطلبة، وهو امتحان -مقياس ذكاء خلينا نحكي-، متكون من 8 فصول: رياضيات"كمي"، كلامي "عربي"، انجليزي.
يعني: مبروك نجاحك في التوجيهي بمعدل 99.9، بس بالعبرية هذا لا يعني شيء عدا عن انك انهيت التعليم الثانوي و ال 99.9 بهاي الحالة = 60 بالمعنى الحرفي للجملة. 
الوزن الأكبر هو لعلامة البسيخومتري، وكل تخصص بده علامة بسيخومتري خاصّة فيه.
** طبعاً مهم كثير أحكي، انه العلامة العالية بالبسيخومتري ما بتيجي بالساهل أبداً، يعني الي بده علامة بسيخومتري عالية بده يدرس منيموم 8 ساعات باليوم لمدة شهرين قبل الامتحان، صعب كثير تصدف معك بالحظ علامة 600+، ما بتعتمد عالغش أبداً حتى لو المراقب غطرش في امكانية انه الطلاب يعترضوا وبنطلب منك اعادة الامتحان.
** مهم جداً نعرف انه (التحضيرية+ البسيخومتري) شيئين مختلفين منفصلين منفردين، التحضيرية ما بتغني وما بتلغي البسيخومتري.
** عشان نتفوق بدنا نجهز حالنا نتعب تعب أكثر من تعب التوجيهي ع ثلث أربع مرات.
رابعاً: زي ما حكيت فوق وجودك في السنة التحضيرية لا يعني انك طالب عبرية، وتقريبا من تجربة أكثر من 50% من طلاب السنة التحضيرية - يا ببطلوا من نص السنة، او في نهاية السنة بحولوا على جامعات ثانية لعدة أسباب- بتمنى بالكومنتس يكتبولنا تجربتهم بالعبرية شو الصعوبات وشو الاشياء المنيحة.
- بعد ما نجيب علامة بسيخومتري بترفع الراس.
- بعد ما نجيب علامة سنة تحضيرية بترفع الراس- طبعاً علامة النجاح فيها 70+
- في عنا امتحانين ظريفين - أمير\ام و ياعيل - يلي هنه امتحانات انجليزي وعبري - الجامعة بتطلب مستوى معين بالانجليزي و العبري واذا تخرجنا من السنة التحضيرية ولسا مش واصلين المستوى مُفضل نعملهن ونجيب العلامة المطلوبة.
- بنشتري طلب تسجيل للجامعة وبنسجل.
هون بنقدر نقول: مبروووك! انت هلا طالب عبرية.
خامساً:
أنا ما بحكي انه الجامعة العبرية أفضل خيار وما بحكي انها أسوء خيار
لما حدا يسالني اذا بنصحه، أنا الصراحة ما بقدر احكي انا بنصح او ما بنصح 
ما بقدر أنكر انه حسب آخر احصائية هي الأفضل بالبلد حسب الترتيب على مستوى العالم، بس طبعا هذا لا يعني انه الكل رح ينجح فيها.
الجامعة العبرية صعبة؟ نعم صعبة وبالأصل دايما بدعايتها بتكون كاتبة "קשה אבל הכי טוב - صعب ولكن الأفضل".
النصيحة الوحيدة الي بدي احكي وهي أهم شي بالبوست كله:
ما تتخلوا عن حلمكم عشان تدخلوا جامعة معينة، تخلوا عن الجامعة "المعينة" عشان تحققوا حلمكم.
اذا حلمك تدرس حقوق وجبت علامة التربية مثلا "مجرد مثال" ما تدرس تربية عشان تكون طالب العبرية، ادرس حقوق عشان تقول حققت حلمك.
لو الجامعة الوحيدة الي بتقبلك عشان تدرس تخصصك الي انت حابه موجودة في كوكب المشتري، بلّش ودي أوراقك لناسا، بس ما تتخلى عن حلمك.
تحياتي